"My Piano (For Horowitz)"

Солонгосын найруулагч Kwon Hyeong-jin-ын 2006 оны бүтээл My Piano (Horobicheu-reul wihayeo).

Vladimir Horowitz шиг алдар нэр нь олонд дуурссан төгөлдөр хуурч болохыг мөрөөдөж явсан ч хөгжмийн өндөр боловсролыг эзэмшихэд хүрэлцэхүйц сургалтын төлбөрийг төлөх боломжгүйгээс хүссэн өндөрлөгтөө хүрч чадаагүй төгөлдөр хуурч Kim Ji-su өөрийн жижиг урлангаа нээж, хүүхдүүдэд төгөлдөр хуур заах сургалтыг явуулж эхэлнэ. Нэгэн санамсаргүй тохиолдлоор хэзээ ч үг дуугардаггүй, дүрсгүйтэж, хэрэг тарьж явдаг Kyung-min хэмээх өнчин хүүг хооллож, хувцаслаж байх амлалтыг эмээд нь өгдөг. Энэ үеэс хойш Kyung-min төрөлхийн гайхалтай авьяасыг олж анзааран, түүнийг төгөлдөр хуур тоглох арга барилд сургаж, Kyung-min-ы чадвар томоохон хөгжмийн мэргэжилтнүүдүүдэд үнэлэгдэж эхэлнэ.

Kyung-min-ы эмээг бие барсаны дараа хүүг Ji-su өргөж авч болохоор, тэд бие биедээ ээж хүү шиг дассан байсан хэдий ч Kyung-min-ы ирээдүйг бодож нэгэн найзыхаа зөвлөсний дагуу сайн багшид даатган гадагшаа сургуульд явуулна. Харин хэдэн жилийн дараа Kyung-min хүү алдартай төгөлдөр хуурч болж, өөрийн бие даасан тоглолтоо хийж, тоглолтыхоо төгсгөлд өөрийн амьдралд чухал нөлөө үзүүлсэн нэгэн хүнд (Ji-su ) зориулж баярлаж талархсан сэтгэлийн үгээ илэрхийлээд Schumann-ы Traumerei аязыг багшдаа зориулж тоглосноор кино төгсөнө.

---

Солонгосын Драма төрлийн нэг ангитай, сэтгэл хөдөлгөсөн үйл явдлаар дүүрэн, гэгээлэг хөгжимлөг, хөгжмийн гоо зүй, уран нарийныг үзэгчдэд мэдрүүж чадахуйц бүтээл болсон гэсэн хувийн зүгээс дүгнэлт өглөө.